Recursos materiais
A Facultade de Comunicación dispón dos recursos materiais necesarios para garantir o adecuado desenvolvemento dun mestrado destas características. En concreto, conta con dúas aulas informáticas equipadas con computadoras PC, así como cunha aula adicional dotada con equipos Mac.
Así mesmo, o centro dispón de dous platós de televisión e estudos de posprodución equipados con tecnoloxía e software de última xeración, un laboratorio de fotografía, varios estudos de radio e un número significativo de aulas e seminarios destinados á docencia.
O mestrado conta cunha aula asignada de forma permanente, o Seminario 305, situado no terceiro andar do edificio. Este espazo dispón de mesas amplas que facilitan o desenvolvemento de sesións prácticas, obradoiros e outras actividades participativas. Non obstante, requírese que o estudantado dispoña de computadora portátil propia co paquete Adobe instalado (Illustrator, InDesign e Photoshop).
Tal e como se reflicte nas enquisas de satisfacción, o profesorado (PDI) valora favorablemente os recursos de apoio á docencia. Cómpre destacar, ademais, o compromiso do decanato do centro coa renovación periódica dos equipamentos e a incorporación de novos recursos, en consonancia coas necesidades das titulacións impartidas.
Recursos e PTXAS
Así mesmo, resulta relevante destacar o alto grao de implicación e eficiencia do PTXAS (persoal técnico, de xestión e de administración e servizos) do centro, que desempeña un papel fundamental na xestión administrativa e no apoio á docencia. Este colectivo contribúe de maneira significativa á resolución de incidencias, á atención ao estudantado e á adecuada xestión dos recursos económicos da titulación.
Valoración dos recursos polo estudantado e o PDI
De acordo cos resultados da Enquisa Oficial de Satisfacción coas titulacións, realizada pola Universidade de Vigo, tanto o estudantado como o profesorado valoran positivamente os recursos dispoñibles para o desenvolvemento da docencia, tanto no que respecta ás clases teóricas como ás prácticas e ás actividades desenvolvidas en estudos e laboratorios.
Por outra banda, o sistema informatizado de reservas de laboratorios e equipamentos demostrou ser un instrumento altamente eficaz, ao optimizar a xestión dos recursos, reducir significativamente os conflitos derivados do uso compartido e mellorar o control e a planificación dos mesmos.